السبت، 3 ديسمبر 2011

تربة عاصية و ليه الأمل


يأسانة روحي حايرة و مُحبطة

نايئة و تايهة و مش متظبطة

جنايني ساقي بذوره بمَية أمل

يمر الموسم في ديل الموسم

و التربة عاصية و إيه العمل ؟!



لا الحب نافع ولا العلام بيفيد

القسوة سكين بيدبح و لكل إيد وريد

يارب سامح، يارب إغفر ،

يارب سّلم و إشفي المريض



خايفة أظلم .. خايفة أكره

خايفة أدعي و المولى يريد

ع البطن اللي جابت و الإيد اللي ربت

ع القرش اللي كبرّ .. قلوب من حديد

غشاوة طفلة.. ورحم حقود

بذرة عايبة .. و منين الردود

طب أدعي بالهداية .. و ألا أدعي بالحماية

و إلا أدعيلك ياربي بالبعد يمكن

بس النسب أقوى من الخلود



الأب ليه مرة جديدة المرة دي تبقى أنا

مكروهة في كل الحواديت ملعونة و متملعنة

مرات الأب وحشة

و الأولاد وكلاهم الوحشة

هوا طاير و نسيم عليل ...

بياض التلج حلوة

و سندريلا - ياحرام - منيماها مع البعير

و الملكة دميمة و ظالمة

مش مستخبية في أوضة ضلمة

ع الورق تكتب .. تبكي و تكتب

يمكن تفهم ، تحاول تقدر ، تحاول تبرر

تساير تعيش...

للأب مرة جديدة و المرة دي تبقى أنا

خلصت أدوار المسرحية ، و مالقوليش غير الدور ده أنا

القطر عدى .. و لما أميري عدى.. كان الوقت عدى

و جريت يا عمري ..

و الأميرة مابقيتش أنا .




ليست هناك تعليقات:

إرسال تعليق