( 1 )
السُخف يخافك و
يرجع فزعان لناسه
يلملم من دروبنا
ألاعيبه و خبثه وحماسه
خاف من إحباطنا
يمكن !!
لّجمه سُكاتنا
يمكن !!
بس اللي مش بعيد و
ممكن
يرجع لنا بكره
حابب ضحكنا و ناسي تكشيرة عُزازه
( 2 )
رباعية ورا رباعية
بينقطهم فتفوته فتفوته
يقعوا منه على
عتبة بيتهم .. حدوتة ورا حدوتة
رباعية ف رباعية
و في الأخر يحوش
عننا المية
لا سيدي يفتح الله
طمعانة أنا ..و
الحسبة مش مظبوطة
( 3 )
طظ في سعادتك و مش
ملعون أبوها الكتابة
مكشر و مهبط
و فرده وش الكآبة
إيه بتقولها
رباعياتك خلصت !!
امال يعمل إيه بقي
اللي ما عنده سطر
يتشدق بيه ريق
للغلابة
و لا عنده حرف يرفعه للسما ظرف
يأسان أنا .. فيغفروله الصحابة
( 4 )
متطلعيش قلم تكتبي
، الكتابة عايقة و نسياكي
و موهبتك ساكته ،
و خرسها ساكن جواكي
متدوريش على سجع و
قافية
مفيش ايدين بارده
و حروفها دافية
مهياش عافية
قالها سعد
بينه كان قاصدها
الكتابة
مفيش فايدة
مهياش عافية
فيتاكي ، فيتاكي
( 5 )
فصحى و الا عامية
عامية و الا فصحى
الهم واحد ...
و كلنا في العجز واحد
و الحر في القلب
واحد
مالناش غير حرف
واحد
إطلع بقى "
وسنظل بالحرف نجاهد "
إعطف و لين "
فحرفي ضنين "
فصحى و الا عامية
الحرف في الأخر ع
النية
و الفكرة اللي
بقالها سنين مستنية
صعب تقولها "
إنتظرني قليلاً "
" إحترت كثيراً "
" و الآن .... "
الفكرة ساعتها و
من غير ما تستنى كاتبها
هيّ بس اللي
بتختار
القرار في الأخر
للفكرة
صحيح الحرف واحد
و كلنا في العجز
واحد
و عمر الكاتب - أو
ساعات -مابيعرفش يعرف
" أيهما " يختار
مهمة الحرف كتابة
و مش مهم " لأيهما " اختار
( 6 )
انطقي بقى ..
زهقت
اكتبي بقى ...
زهقت
اسكتي بقى ..
زهقت
زهقت بقى ..
سكت
(
7 )
ضحكة عالية أبويا
ورثهالي
بضحكها زيه و
أفتكره واقف قبالي
أمي علمتني أخبيها
ضروري ، ضروري
قالتلي أمي إنها
ضحكة رجالي
رجالي ، رجالي
المهم إنها بترن
في خياله .. و خيالي !!
( 8 )
عرافة ساكته .. و
كتمة التعليق بنفسين
عارفاني بأكتب ..
امال تايهة الكتابة مني فين ؟
مفضلش حرف
تعملهولي حجاب
سابقوني على
الحروف الأهل و الأصحاب
قالتلي بصمت و
سكتها رنين
وشوشي الورق
يابنية
يجيلك في طرفة عين
و سطورك بقوا خمسة
في عين الحسود و
البين
و القافية تحكم ..
زين و شين
و السطر الثامن
جي في فكرة واحدة
و الواحد سينارست
أعظم .. حي
نسيت قلمك ، سلفني
حرفك
ديني فكرة ،
أرجعهالك فكرة
أرجعهالك بكرة
فوايدها صحبة
و الفرقة صعبة ..
آه يابا في السطر العاشر ضي
ضي دمعة .. و لليتم جامعة
و " خصومة
قلبي " و الناس مش سامعة
نسيت ألامك ،
سلفني حرفك
و الضحكة عالية
ديني فكرة ،
أرجعهالك ذكرى
أرجعالك بكرة
الفرقة صعبة
لو بس تلتلم حروف
الكتابة و تقولي جي
( 9
)
بتضحك ! .. سارقة
مزيكة الرباعيات و سارحة
بأكتب أنا ..
كدبة آه .. بس
المرة دي طارحة
حأكمل السطر إتنين
.. و حأعاند و أقفلهم أربعة
عارفة إنها مش
كتابة طبعاً
وماله .. ما
الحروف كلها شكل واحد و هي خارجة من المطبعة
( 10
)
بأخرف يا صاحبي
مالك ؟! حتسألني يعني إيه ؟!
قلم و بيكتب ..
سألت أبن أختك بيشغبط على الحيط ليه ؟!
ورق فاضي و قلمي
مليان .. ما أكتبش ليه ؟!
لكن تسأل أنت و
أنا أجاوب و أحلل و أبرر
الكتابة جاية منين و رايحة لفين
لأ بأخرف بس مش
للدرجة دي ياصاحبي
الورق كان فاضي و
قلبي - طول الوقت - مليان
أكتر من كده تستحي
ايدي قبل العين
لا حروفي دي كتابة
و لا أنا عارفة
رايحة لفين و لمين
( 11 )
لا أنت قمح و لا
سكر و لا حتى إزازة زيت
و لا رغوة صابون
معطر ، و لا خلطة سرية لست البيت
مؤلف أنت يا
مسكين..
و سلعتك كتابة
تعلنها لوحدك و ليك وحدك على حيط ورا حيط
و إن ضاقت بيك
جدرانها .. و مالقيتش حد جبّارنا و صانها
مبتبطلش كتابة ،
متقدرش
ساعتها بس بتقدر
تغير دهان الحيط ، أو بيع البيت
( 12 )
خطي ده أيوه ..
عارفاه .. فاكراه
ماله كده معوج و
ملخبط و كاتب أرقام جُباه
راح فين حرفك يا
بنية
سبته هنا من شوية
مع إنها نفس
الصفحة و نفس الحبر
تايه حرفك .. يا
ولداه
( 13 )
يوم الموقف العظيم
هنطلع يا ترى صف واحد و الا صفين
و الكتاب و النقاد
ياتري حيوقفوهم لوحدهم و الا حيوقفوهم مع التانين
طابور الحريم هنا
و طابور الرجالة واقف هناك
طب و كتبنا اللي
في ايدينا هيتصنفوا برضه
أدب ذكوري هنا و أدب نسوي هناك .. هنــــــــاك !
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
على قهوة صدفة ،
والصحبة مش صدفة ، و لو وحي صدفة وحيك مش صدفة
اقرالي و إصفى ،
منك الوصفة ، سامحني يا صاحبي و لو انك عارف عشم الأحبة مُسرف ،
والوحي فوق
المشاريب دايماً طريقه مُكلف ، إتحملني و إصفى ، منك الوصفة ، و لو وحي صدفة
وحيك ع الأكيد مش
صدفة .
ليست هناك تعليقات:
إرسال تعليق